CAMPO MAGNÉTICO

Campo Magnético foi unha acción excepcional e única, preparada especialmente para o marco das festas de María Pita 2015, na que por primeira vez reuníronse unha ducia de artistas locais independentes, relacionados coas artes do movemento en clave contemporánea, para formar parte dun proceso de creación singular.

Unha experiencia colectiva arriscada e emocionante, un verdadeiro reto onde lle trasladamos unha invitación moi particular ao artista Félix Fernández para que firmase unha acción que se construía co grupo completo na mesma semana da apertura pública. Unha suma de voluntades a favor dunha experiencia simbólica e irrepetible.

O irrepetible sucedeu. O sábado 8 de agosto bailamos xuntos no Parque da Sardiñeira para unha gran cantidade de persoas que contra pronóstico encheron a plaza.