Capítulo expandido de Residencias Paraíso 

Cruceiros Paraíso é un capítulo expandido do programa de Residencias Paraíso que nos sirve para tecer pontes con outros contextos e seguir brindando apoio ao tecido artístico galego ao longo do ano, máis alá da convocatoria anual. Atopa na mobilidade, o contaxio con outros territorios e a contaminación entre artistas, a súa razón de ser.

 

Así, distintos/as artistas puideron coñecer outros territorios e empaparse doutras realidades nos últimos anos a través desta liña de apoio que dende 2020 se articula a través da figura das socias-amigas de Colectivo RPM; un corpo colectivo –en saborosa definición– de persoas vinculadas ás artes vivas e a creación contemporánea en Galicia. 

 

Do mesmo xeito que o ano pasado, a pregunta é simple: ¿pode Cruceiros Paraíso –o espazo que ocupa, os recursos que xestiona– axudar a este corpo colectivo?

Espazos colaboradores 2017 - 2021

  • Graner en Barcelona

  • Tenerife LAV en Tenerife

  • Dantzagunea en Donostia

  • Azala en Lasierra (Álava)

  • Café de las Artes en Santander

  • Presente Continuo en Lugo

  • A Casa Vella en Allariz 

Método 2.0 (2021)

Este ano planteamos un proceso similar ao do ano anterior coa diferenza de que faremos un encontro presencial específico o día 1 de xullo de 2021 no Auditorio de Galicia.

 

Antes desta data, precisaríamos que as socias-amigas enviedes un PDF de 1-2 páxinas coa vosa idea (que imaxinades e que precisades de nós).

 

No encontro de Colectivo RPM poderemos falar xuntas deste capítulo e por algunhas opcións enriba da mesa.

 

Ao longo do mes de xullo Colectivo RPM valoraría polo miúdo ata onde pode chegar, fai unha escolla e contrastaría a proposta de apoio con todas vós.

CRUCEIROS

PARAÍSO 

SOCIAS-AMIGAS

Imaxinemos xuntas

Imaxinemos unha parella de artistas en residencia en Bruselas que abren o seu proceso para acoller a unha artista convidada, que se empape tanto da investigación como do contexto belga, e a Colectivo RPM mercando un voo.

Imaxinemos a unha artista convidada a unha estancia en Barcelona na que coñecer de cerca un proxecto análogo ao propio e precisa un apoio económico para a súa viaxe.

Imaxinemos unha artista que xestiona un espazo de creación en Galicia, a outra artista con necesidade imperiosa de mover corpo e pensamento e a Colectivo RPM facendo match​.

Imaxinemos a unha curadora que precisa trasladarse a un festival porque está interesada en coñecer o traballo en vivo dunha artista, tomarse un café con ela, poñerse cara, e a Colectivo RPM reservando un hotel e pagando unhas dietas.

Imaxinemos a dúas artistas que coquetean na distancia dende fai tempo e que teñen vontade de encontro carnal nalgún espazo que permita palparse con tempo.

Imaxinemos a unha artista que coñece un espazo de residencia de primeira man ao que falarlle de Residencias Paraíso e co que podemos ter un primeiro tonteo dentro de Cruceiro Paraíso.

Imaxinemos a unha artista multidisciplinar na súa casa coa maleta preparada para achegarse a un proceso de creación e aprender en doble dirección.

Imaxinemos.