Neste apartado de desbordamentos recollemos distintas actividades que se desenvolven ao longo do noso percorrido: participación en encontros, actividades puntuais, etc.
2023
Exercicios diarios para corpos sensibles
Acabando o verán 2023, publicamos unha colección de vídeos – preparados especialmente para redes sociais– para achegarnos a distintos universos artísticos. Da man de oito artistas do noso territorio –Mónica Mura, Julia Laport, Fran Martínez, Cris Balboa, Tina Roco, Bal Castro & Inés Santos, Alejandra Balboa e Sabela Domínguez– creamos este repositorio dixital. Un proxecto que foi posible grazas ao apopio do INAEM / Ministerio de Cultura, a través dos Fondos Next Generation da Unión Europea.
2023
Dance Interfaces | Plataforma para a internacionalización e promoción da danza made in Canarias
No verán 2023, Caterina Varela participou como convidada na plataforma bianual Dance Interfaces en Tenerife coñecendo de primeira man o traballo de distintas artistas canarias e doutras colegas de distintos territorios. Dance Interfaces está impulsada polo Laboratorio de Artes | Tenerife LAV.
2022
Expedición Portugal
No ano 2022, Caterina Varela e Félix Fernández viaxaron en varias ocasións a Portugal para se atopar con outras profesionais portuguesas e coñecer máis de cerca o contexto do país veciño, grazas ao apoio de Acción y Promoción Cultural do Ministerio de Cultura, e dentro da nosa estratexia de apertura a Portugal.
Nesta expedición, pudieron atoparse con Catarina Saraiva e Alexandre Valinho da plataforma Linha de Fuga, con Paulo Covas de Campus Paulo Cunha Silva en Porto, con Rui Torrinha, director artístico do CCVF de Guimarães, con Diana Estrela e Beatriz Lobo de A Turma en Porto, con Ana Carvalhosa, Pedro Vilela e André Braga da CRL – Central Elétrica de Porto, con Sofia Freitas de Mala Voadora en Oporto, con Elisabete Paiva e Sofía Matos de Materiais Diversos en Lisboa, con Carla Sobre Nousa, co-directora artística de Espaço Alkantara en Lisboa, con Diana Lopes de Polo Cultura Gaivotas Boavista en Lisboa e con Tânia M. Guerreiro de PI Produções Independentes.
2020
Publicación | Prácticas inspiradoras de las artes vivas en Iberoamérica
No ano 2020, o Festival Grec de Barcelona apoia e acolle a presentación dunha publicación –impulsada por Catarina Saraiva, Eduardo Bonito, Fernando García e Natacha Melo–, co nome Prácticas inspiradoras de las artes vivas en Iberoamérica, un mapeo que recolle distintas experiencias de gran interese a ambos lados do océano. Despois dunha primeira edición con 55 prácticas chegaron a 100 prácticas cunha publicación, de libre acceso, presentada no FIT de Cádiz 2021.
2020
Habitación Peregrina
Fumos convidadas a presentar o proxecto de Residencias Paraíso no encontro sectorial Habitación Peregrina promovido por Camiño Escena Norte, no Vello Cárcere de Lugo. Alí, Caterina Varela, puido trasladar as claves do programa e coñecer outros proxectos da costa cantábrica.
2018
Taller Fluxonomía no Festival DNA
Dentro do programa do festival DNA de Pamplona Félix Fernández e Caterina Varela participamos dun encontro con distintos profesionais nacionais arredor do tema da Fluxonomía e da Economía 4D. Estivemos traballando man a man cas distintas compañeiras ao longo de tres días na cidade navarra.
2018
Galicia Escena Pro
Dentro do programa de conferencias da feira profesional impulsada polo Agadic fixemos unha presentación do programa na biblioteca do Salón Teatro preparada para o contexto de socios da propia Rede Galega de Teatros e Auditorios, levada a cabo por Rut Balbís e Caterina Varela.
2018
Encontro Artistas Novos
Do mesmo xeito, Félix Fernández fixo unha presentación do programa e do funcionamento da convocatoria de Residencias Paraíso dentro das ponencias que se realizan dentro do Encontro de Artistas Novos, recalcando a interdisciplinaridade da convocatoria.
2018
Festival WOS
No contexto do Festival WOS, Rut Balbís participou da mesa de debate titulada “Temos que falar: novas políticas de xestión cultural” no CGAC (Centro Galego de Arte Contemporáneo) en Santiago de Compostela.
2018
Culturgal
Convidadas por Escena Galega, Caterina Varela participou no Cultugal 2018 no marco das xornadas “Unha escena galega para o futuro: na busca de novos modelos e sinerxias para a xestión e creación nas artes escénicas” no Pazo da Cultura de Pontevedra.
2017
Jastas Pista
Jastas pista foi un conxunto de accións que se desenvolveron no barrio de Montealto da Coruña, coa vontade de involucrar á comunidade dese barrio en actividades relacionadas coa danza e co corpo en movemento dunha maneira lúdica, educativa e participativa.
O proxecto soñaba coa idea de recuperar a praza, o espazo público, como campo de batalla comunitario. Unha batalla figurada na que converter a praza en pista de baile, recuperando á súa vez a forza da experiencia colectiva.
Como colofón, o Maratón Jastas Pista foi un concurso de baile por parellas para veciños e veciñas da cidade, co acompañamento do DJ Isaac Peixes, Areta Bolado como mestra de cerimonias e un xurado popular.
2017
Let’s dance
Let's dance foron unha serie de encontros que se celebraban as mañás dos domingos do mes de outubro de 2017 no Campo da Leña. Encontros onde os corpos se activaron de forma colectiva a través do movemento nunhas sesións guiadas por distintos artistas convidadas (Armando Martén, Andrea Quintana, Cristina Montero, Alexis Fernández, Ánxela Blanco, Félix Fernández, Iván Marcos e Caterina Varela).
Dentro do contexto de Nocturnia –o programa de lecer alternativo da Concellería de Xuventude do Concello da Coruña– tamén activamos encontros nocturnos para os adolescentes da cidade.
2017
Remezcla Popular
Remezcla Popular foi un proceso de creación cunha comunidade non profesional da cidade, pilotado por un artista local (Leodán Rodríguez) e tendo como motor creativo a reinterpretación dunha peza fundamental da danza contemporánea galega (Cara Pintada de Janet Novás). O obxectivo desta acción era transmitir as lóxicas da creación contemporánea aos nosos veciños e veciñas. Ao mesmo tempo, poñer en valor a creación contemporánea galega.
2015
Campo Magnético
Campo Magnético foi unha acción excepcional e única, preparada especialmente para o marco das festas de María Pita 2015, na que por primeira vez reuníronse unha ducia de artistas locais independentes (Rut Balbís, Ánxela Blanco, Blanca Blanco, Alexis Fernández, Carolina Fernández, Félix Fernández, Armando Martén, Kirenia Martínez, Ana Beatriz Pérez, Carlota Pérez, Andrea Quintana e Caterina Varela) relacionadas coas artes do movemento en clave contemporánea, para formar parte dun proceso de creación singular.
Unha experiencia colectiva para a que lle trasladamos un convite a Félix Fernández para que asinase unha acción que se construíse co grupo completo na mesma semana da apertura pública. Unha suma de vontades a favor dunha experiencia simbólica e irrepetible.
O sábado 8 de agosto bailamos xuntos no Parque da Sardiñeira para unha gran cantidade de persoas que contra pronóstico encheron a praza.