HIPERESPAZOS. A CASA FÓRA DA CASA.

Ao longo destas xornadas, e dentro do proceso de repensar os usos dos espazos e equipamentos institucionais existentes na nosa cidade, coñeceremos certos exemplos inspiradores da península que funcionan de xeito innovador arredor do concepto de residencia artística, da planificación e uso integral de espazos culturais e socio-comunitarios e da aposta de cada territorio polo seu talento artístico e polo desenvolvemento da súa creatividade.

Queremos imaxinar alén do que coñecemos. Queremos comezar a bosquexar xuntas un horizonte aberto, libre e plural para a convivencia e o desenvolvemento creativo dentro dos nosos equipamentos, un horizonte sustentable e digno que serva tamén como garante das condicións materiais, económicas e de vida dos axentes relacionados ca cultura no noso territorio. Comecemos unha travesía cara o hiperespazo.

O hiperespazo defínese pola súa falta -ou imposibilidade- de definición. É o misterio, o infinito sen fronteiras onde podemos reinventarnos ou repensarnos. A páxina ou o lenzo en branco, o escenario baleiro, o espazo en silencio. É un lugar disposto á experimentación, a que aconteza nel o descoñecido. Dentro do hiperespazo atopamos máis que unha relación espazo-tempo. Atopamos outras moitas dimensións e capas, magnitudes máis intanxibles como os afectos, o acompañamento, o coidado, a flexibilidade, e tantas outras por revelar. É un espazo baleiro, flexible e aberto, disposto a ser habitado de tal xeito que poida darse ese paradoxo tan especial e inspirador: o de sentirse como na casa, aínda estando fóra da casa.

Durante as xornadas, ademais de achegarnos aos universos particulares de proxectos e persoas convidadas –que compartirán a súa experiencia dende bibliotecas, centros cívicos e sociais, espazos culturais, residencias artísticas, espazos auto-xestionados… – propoñemos unha viaxe conxunta a eses universos comúns polos que é preciso transitar para construír un proxecto innovador, dinámico, aberto, participado, integrador e sustentable. Deste xeito, ao longo de tres días abriremos distintos espazos de aprendizaxe colectiva para imaxinar xuntas eses universos que configuran o hiperespazo: as persoas (equipos e usuarias), as estruturas administrativas e xurídicas, os afectos, os recursos económicos, os recursos técnicos e materiais, o diálogo co contexto, e os criterios e identidade propias.

Programa das xornadas.

21, 22 e 23 de novembro de 2017.

A proposta Hiperespazos, que fai referencia de xeito simbólico á proxección e imaxinación do espazo que está por construír, permitirá achegar á cidadanía exemplos que funcionan de xeito innovador arredor do concepto de residencia artística, da planificación e uso integral de espazos culturais e socio-comunitarios, así como da aposta de cada territorio polo seu talento artístico e polo desenvolvemento da súa creatividade. Será a través da participación de persoal técnico de bibliotecas, centros cívicos e sociais, espazos culturais e autoxestionados ou promotor de residencias artísticas de diferentes municipios, co obxectivo de facilitar a aprendizaxe colectiva dos distintos universos que conforman o hiperespazo: as persoas, as estruturas administrativas e xurídicas, os recursos económicos, os recursos técnicos e materiais, os afectos, o diálogo co contexto ou a identidade propia.

máis info >

Relatoría e documentación de Hiperespazos.

Para todas as persoas que non puideron achegarse ás xornadas existen dous grupos importantes de materiais de consulta.

 

Por unha banda, os vídeos de documentación de cada unha das presentacións e dinámicas propostas nos universos -que dan conta testimonial do acontecido cas persoas participantes- e, pola outra banda, o exercicio de reflexión e análise que o grupo de relatores -Ania González, Horacio González e Enrique Lista- nos achegan no seu relato conxunto. Unha ferramenta marabillosa para seguer tirando dos fíos que apareceron durante Hiperespazos.

máis info >

> fotos Nela Fraga

máis info >