CabeceraFBParaiso2021.png

EDICIONES

2017  I  2018  I  2019  I  2020  I  2021

ARTISTAS 2021 

Por quinto ano consecutivo abrimos unha nova convocatoria anual de Residencias Paraíso, o programa de residencias artísticas para a danza e as artes vivas impulsado polo Colectivo RPM, como entidade independente adicada ao impulso da danza e a creación contemporánea en Galicia, e o apoio da Xunta de Galicia a través da Axencia Galega das Industrias Culturais, e das distintas institucións co-produtoras do programa, Concello de 

Residencias Paraíso vén de atravesar o intenso e bonito proceso de selección das artistas que acompañaremos na quinta edición do programa. Nun contexto de enorme vulnerabilidade provocada pola crise sanitaria –unha situación que supón un antes e un despois para a comunidade artística– é toda unha alegría sacar adiante este programa. Baixo o noso punto de vista, Residencias Paraíso ocupa un espazo necesario no ecosistema das artes vivas en Galicia e non podemos estar máis orgullosas de camiñar canda el.

Son cinco os programas que tivemos que resolver dende Colectivo RPM. Neste tempo aprendimos moitas cousas. Entre todas, o proceso de recibir os vosos proxectos, lervos e coñecervos un pouco máis é das máis estimulantes. Significa coñecer por primeira vez a moitas artistas do territorio galego e nacional que non coñecíamos, ou recoñecer e vernos reflexadas en tantas compañeiras de aquí e alá. Aprendemos da vosa integridade e dos modos que cada unha de vós ten de abrir cada proceso. De verdade que supón un aprendizaxe tremendo que non agardábamos cando puxemos o programa en marcha e que sempre trae máis luces que sombras.

Son 8 os procesos artísticos que acompañaremos en 2021 despois de valorar un total de 160 proxectos (máis do dobre da media dos anos anteriores). A comisión deste ano estivo formada por Caterina Varela e Felix Fernández –por Colectivo RPM– e Cris Vilariño, Cristina Moreira e Jacobo Pallarés, como profesionais convidadas. Xuntas, levamos a termo a difícil tarea de por sobre a mesa distintos criterios para chegar a un equilibrio no grupo de artistas Paraíso 2021.

 

Dentro do grupo de artistas Paraíso 2021, acolleremos o proceso de investigación “Antes todo esto era campo” de Colectivo Nerval, unha instalación interactiva –a cabalo entre o concerto e a experiencia escénica– para humanos e plantas que van na procura da posibilidade de reconectarse. Un proxecto que vén dende Valencia para gozar de dúas semanas de residencia combinada entre Normal (Universidade da Coruña) e o Teatro Rosalía de Castro da Coruña entre maio e xuño.

Adriana Reyes é a segunda artista nacional desta edición que estará na residencia que realizamos en diálogo coa MIT de Ribadavia. O seu proxecto de performance “Coreografías selváticas” interésase pola produción sensible arredor dos movementos e formas da vida vexetal a través do estudo de vinte plantas –amazónicas e ibéricas– coas que leva investigando nos últimos anos. Un libro de botánica en movemento que estará en residenica na Igrexa da Madalena de Ribadavia durante dúas semanas do mes de xullo.

Acompañaremos ao colectivo Octopus to the party cun proxecto do mesmo nome que aborda desde unha óptica transdisciplinar o concepto de festa como elemento vertebrador social indispensable, actualmente en crise pola situación de pandemia que estamos a vivir. A súa residencia desenvolverase nunha residencia combinada entre a Cidade da Cultura de Galicia e o Salón Teatro de Santiago de Compostela durante tres semanas do mes de xullo.

Na mesma combinación anterior de espazos en residencia e durante tres semanas entre xullo e agosto, estará inscrito o proceso de María Llanderas “A idea primaria é esnaquizalo a cabezadas”. Un proxecto no que abraza o espírito inconforme da poeta Xela Arias e o seu pulo por facer da súa obra escrita unha arma viva, trasladando ao corpo e ás artes vivas toda esa linguaxe emocional. 

Será o Pazo da Cultura de Carballo o espazo anfitrión que albergará a residencia de Marta Valverde co proxecto “30' 70 60' 120” que reflexiona sobre a precarización actual –no traballo en xeral e no traballo sexual en particular–, dende unha perspectiva documental que mistura o live cinema e a conferencia performativa. Esta residencia levarase a cabo durante tres semanas entre os meses de xullo e outubro.

Estaremos ao carón do proceso de creación de “El dios del pop” de Diego Anido. Un percorrido desordenado polos fitos que consolidaron a cultura pop, un relato autobiográfico fantástico para o que Diego estará en residencia no Pazo da Cultura de Narón durante dúas semanas entre agosto e setembro.

A primeira quincena de agosto O vello cárcere de Lugo acollerá a Miriam Rodríguez e Olga Cameselle para a realización da peza de videodanza “Memorias danzantes” que busca repensar o paso do tempo no corpo feminino desde un punto de vista interxeracional. 

 

Por último, durante dúas semanas do mes de setembro acompañaremos o proceso “Cerimonia” dentro da primeira Residencia Paraíso que albergará o Centro Torrente Ballester de Ferrol, da man das artistas Helena Salgueiro e Verónica Moar. Unha sinerxia interdisciplinar onde a escultura en cerámica, a danza e a performatividade tenderán unha ponte entre Oriente e Occidente.

Oito proxectos que poñen no punto de mira cuestións fundamentais para o noso día a día impulsados por artistas capaces e inspiradoras que falan por si mesmas da inmensa potencia da comunidade artística vinculada ás artes vivas. 
 
Os proxectos recibirán un apoio de entre 1.800 e 3.000 euros ata o total de 20.000 euros cos que se activa a convocatoria 2021. Unha convocatoria impulsada dende Colectivo RPM que conta co apoio da apoio da Xunta de Galicia a través da Axencia Galega das Industrias Culturais, e das distintas institucións co-produtoras do programa, Concello de Santiago, Concello da Coruña, Concello de Lugo, Concello de Ferrol, Vicereitoría de Igualdade, Cultura e Deporte da UDC, Mostra Internacional de Teatro de Ribadavia e Fundación Cidade da Cultura, así como coa colaboración fundamental dos distintos espazos cómplices.
 
Emocionadas e expectantes por mergullarnos nesta nova aventura, dámoslle a benvida á quinta edición de Residencias Paraíso 2021. 

Grazas por nos acompañar.